Оралда «Аққулар» мен «Сұңқарлар» ұсталды

Durbi.kz. 2009 жылы Қазақстан аумағында заңмен тыйым салынған  «Ата жолы» тылсым-мистикалық» діни ағымының 4 мүшесі «Орал- Алматы» бағытындағы пойызға отыру үстінде  ұсталды.

Орал станциясы Полиция желілік бөліміне 14 қыркүйек күні түскен  жасырын қоңырау бойынша анықталғандай, тіркеуден өтпеген «Ата жолы» ұйымының мүшелері «Орал-Алматы» пойызымен Алматы бағытына жүріп кеткелі тұр екен.

Көлік полициясы, Батыс Қазақстан полиция департаменті және Батыс Қазақстан облысы Дін істері басқармасымен бірлескен рейдте анықталғандай, 41-50 жас аралығындағы Орал қаласының 4 тұрғынына әкімшілік хаттама толтырылды. Олар ҚР Әкімшілік құқық бұзушылық туралы Кодексіның 489 бабының (Қазақстан Республикасының қоғамдық бiрлестiктер туралы заңнамасын бұзу, сондай-ақ Қазақстан Республикасының заңнамасында белгіленген тәртіппен тіркелмеген қоғамдық, дiни бiрлестiктердiң қызметіне басшылық жасау, қатысу, олардың қызметiн қаржыландыру) 9,10-тармақтары бойынша 50 және 100 есептік көрсеткіш мөлшерінде айыппұл төлейтін болды.

«Тіркелмеген, алайда жасырын түрде қызметтерін жалғастырып жүрген «Ата жолы» ұйымы туралы мәліметтерді тексеру үстіндеміз» деген БҚО-ның құқық қорғау органы қызметкерлері облыс тұрғындарын діни ағымдардың ықпалына түспеуге, аса сақ болуға шақырады.

Оралдағы «Ата жолы» ұйымы туралы толық  мақаланы сайтымыздан алдағы күндерде оқи аласыздар.

«Дүрбі»