Бас мүфти ораза айтпен құттықтады

Серікбай қажы ОРАЗ, 

Қазақстан мұсылмандары діни басқармасының төрағасы, Бас мүфти:

Қадірлі отандастар, құрметті бауырлар!

Баршаңызды күллі мұсылман үмбетінің ұлық мерекесі – ораза айтпен құттықтаймын. Әр отбасына бақ пен береке, бірлік пен игілік тілеймін. Алла Тағала отыз күн тұтқан оразамызды, жасаған құлшылық-ғибадатымызды, берген садақымызды, барша игі ималымызды қабыл етіп, мол сауаптан жазғай!

Жаратушы Жаббар Иеміз: «Пенделерiм Мен парыз еткен оразаны атқарып, ақысын алуға (айт намазын өтеуге) мешiтке бет алды. Олар Мен үшiн ораза ұстады, Менiң пәрменiммен ауыз ашты, ендi қуанышқа кенелсiн…» – деп сүйінші хабар жеткізген.

«Айт» сөзі – «мерекелеу», «хал сұрасу», «бір-бірін қуанту», «қуанышқа топталу», «қарымта» деген мағыналарды білдіреді. Алла Тағала барша отбасына берекетін жаудырып, қасиетті рамазан айында ыждаһаттылықпен ауыз бекіткен жамағаттың қуанышын арттырғай!

Құрметті қауым!

Рамазан айында мешіттерімізде ауызашар беріліп, қайырымдылық іс-шаралар жүзеге асты. Көпбалалы отбасылар мен көмекке мұқтаж жандарға қайырымдылық жасалды. Осынау игі іске үлес қосқан барша жомарт жандарға алғыс айтып, Алла разы болсын деймін.

Ораза айт мерекесі құтты болсын! Алла Тағала дұға-тілегімізді, қасиетті айда жасаған қайырлы амалымызды, берген зекет пен пітір садақамызды қабыл еткей!

Әрбір отбасына амандық, жақсылық тілеймін. Раббымыз рамазаннан рамазанға дейін айдан аман, жылдан есен жеткізе бергей! Еліміз аман, жұртымыз тыныш болғай! Әумин!